Musharaxa u taagan xilka madaxtinimada Dowlad goboleedka Galmudug, Mudane Liibaan Axmed Xasan, ayaa si diirran u soo dhoweeyey jadwalka doorashooyinka “Qof iyo Cod” ah ee uu soo saaray Guddiga Madaxa bannaan ee Doorashooyinka iyo Soohdimaha Qaranka
Musharax Liibaan ayaa tallaabadan ku tilmaamay mid taariikhi ah oo loo qaaday dhanka dimuqraadiyadda iyo xasilloonida dalka, isagoo si gaar ah u xusay muhiimadda ay leedahay in Galmudug ay ka dhacdo doorasho taariikhdu marka ay tahay 13-ka May 2026.
Qodobbada ugu Muhiimsan ee uu kadhawaajiyey Musharaxa Liibaan:
- Musharaxa ayaa carrabka ku adkeeyey in kasta oo doorashooyinku ay horay u soo daaheen, haddana ay lagama maarmaan tahay in markan lagu qabto waqtiga loo asteeyey, lagana fogaado dib u dhac.
- Wuxuu ugu baaqay shacabka reer Galmudug, gaar ahaan taageerayaashiisa, inay si firfircoon isugu diiwaangeliyaan hannaanka codbixinta, si ay uga qayb qaataan go’aan ka gaarista mustaqbalkooda.
- Musharaxa Liibaan ayaa sheegay inuu diyaar u yahay inuu hormuud ka noqdo isbeddel dhab ah oo Galmudug ka hirgeliya horumar iyo caddaalad loo siman yahay.
“Waxaan rajeynayaa in la i doorto si aan u hirgeliyo horumar iyo cadaalad loo siman yahay,” ayuu yiri Musharax Liibaan Axmed Xasan oo muujiyey sida uu ugu kalsoon yahay tartanka madaxtinimada ee Galmudug.
