Guddiga Madaxa Bannaan ee Doorashooyinka Qaranka iyo Soohdimaha (GMDQS) ayaa maanta si rasmi ah degmada Waajid ee Gobolka Bakool uga daah furay tababar aqoon kororsi ah oo loo samaynayo howl wadeennada ka shaqayn doona hannaanka doorashooyinka ee degmadaas.
Tababarkan ayaa qayb ka ah qorshaha Guddiga ee lagu dhisayo cudud farsamo oo u diyaarsan maamulidda codbixinta, hubinta hufnaanta doorashada, iyo sidii dadweynaha loogu adeegi lahaa maalinta doorashada.
Qodobbada Diiradda lagu saarayo Tababarka:
- Barashada hab raacyada rasmiga ah ee qabashada codadka iyo maaraynta agabka doorashada.
- In howl wadeennadu u gutaan waajibaadkooda si dhex dhexaad ah, iyagoo raacaya shuruucda doorashooyinka dalka.
- In muwaadiniinta degmada Waajid loo abuuro jawi habaysan oo ay si nabadgelyo leh ku dhiiban karaan codkooda.
Guddiga Doorashooyinka Qaranka ayaa xoogga saaraya in degmo kasta ay hesho howl wadeenno si heer sare ah u tababaran, si loo xaqiijiyo doorasho qof iyo cod ah oo lagu kalsoonaan karo. Tallaabadan ayaa muujinaysa sida ay GMDQS uga go’an tahay in hannaanka dimuqraadiyeynta dalku uu gaaro deegaan kasta.
