Guddiga Madaxa Bannaan ee Doorashooyinka Qaranka iyo Soohdimaha ayaa sii ballaariyey hannaanka diiwaangelinta codbixiyeyaasha, iyagoo maanta gaaray degmooyin iyo deegaanno muhiim u ah doorashooyinka dalka
Daahfurka Degmada Ceelbarde
Guddiga ayaa si rasmi ah diiwaangelinta codbixiyeyaasha uga daahfuray degmada Ceelbarde ee Gobolka Bakool. Tallaabadan ayaa qayb ka ah qorshaha Guddiga ee lagu xaqiijinayo in muwaadiniinta ku nool deegaannada fog fog ay helaan fursad ay isku diiwaangeliyaan si ay uga qayb qaataan doorashooyinka soo socda.
Ballaarinta Gobolka Mudug
Dhanka kale, Guddiga ayaa gaaray deegaannada Gawaan iyo Qararow oo hoos taga degmada Hobyo ee Gobolka Mudug. Hawlgalkan ayaa loogu talagalay in lagu fududeeyo adeegga diiwaangelinta, si dadka xoolo dhaqatada iyo beeralayda ah ee ku nool tuulooyinka hoos yimaada Hobyo ay u helaan xuquuqdooda codbixineed iyagoon u safrin masaafo fog.
Dadaalka GMDQS
Mas’uuliyiinta Guddiga ayaa xaqiijiyey inay ka go’an tahay gaarista dhammaan deegaannada dalka si loo hubiyo doorasho qof iyo cod ah oo hufan. Waxay ugu baaqeen shacabka ku nool Ceelbarde, Gawaan, iyo Qararow inay u soo baxaan goobaha loo asteeyey diiwaangelinta si ay u helaan kaararkooda codbixinta.
